Yn ogystal â thrawsnewid gwasanaethau iechyd a lles drwy fodel newydd o ofal a lles, mae cyfle unwaith mewn oes i greu Campws Iechyd a Lles Amlasiantaethol yng nghanol y Drenewydd. Gallai hwn fod y campws rhyng-genhedlaeth cyntaf ym Mhowys, a gallai gynnwys addysg gynradd, iechyd, gofal cymdeithasol a llety â chymorth.

 

Mae'r safle a ffefrir ar gyfer y campws wrth ymyl Stryd y Parc, Y Drenewydd. Ymhlith y gwasanaethau sydd ar y safle ar hyn o bryd mae Canolfan Ddydd y Parc, Canolfan Integredig y Drenewydd (adeilad Ysgol Dafydd Llwyd gynt), y llyfrgell ac Ysgol Calon y Dderwen.

 

Ar y safle hwn, rydym yn cynllunio ar gyfer ysbyty newydd o'r radd flaenaf (gan ddisodli'r cyfleusterau presennol yn Ysbyty Sir Drefaldwyn ac sy'n cynnwys trydedd Ganolfan Ranbarthol Wledig ar gyfer y sir) adeilad ysgol newydd, Academi Iechyd a Gofal, llyfrgelloedd cyhoeddus ac academaidd yn ogystal ag ardal lles dan do ac yn yr awyr agored a rhywfaint o lety â chymorth.  

​​

Mae'r Rhaglen Lles Gogledd Powys ar hyn o bryd yn y cyfnod cynllunio a gweledigaeth gynnar. Bydd gweledigaeth glir o sut y gallai'r model gofal newydd hwn edrych gartref ac yn ein cymunedau yn cael ei siapio gan bobl gogledd Powys trwy gyd-gynhyrchu; gwneud gyda, nid ar gyfer. Wrth i'r rhaglen fynd yn ei blaen, byddwn yn dechrau diffinio'n fanylach pa wasanaethau iechyd a gofal a ddarperir o'r tu mewn i'r campws.